منذ عدة أيام وقبل مجزرة بورسعيد المؤلمة كنت اشتري مع زوجي بعض لوازم المنزل
فتوقفت فجأة وسألته:
مصطفي...تفتكر الشهيد لما يستشهد بيحصل ايه؟
يعني ايه السيناريو اللي بيحصل بعد ما روحه تفارق جسمه وتروح عند ملك الملوك؟
ويبدو انه لم يفهم سؤالي جيدا فتطلع إلي مستفهما فعاودته:
يعني تفتكر لما يستشهد ويروح الجنة بيحصل ايه؟
بيكون عارف انه شهيد وعارف مكانه في الجنة وبُشِر بده قبل ما يروحها أصلا؟
ولا الموضوع بيحصل في غمضة عين وبيبقي مش عارف ايه اللي بيحصل ويبقي زي اللي نام ويصحي ويلاقي نفسه اتنقل من مكان لمكان فجأة؟
وفرضا لو التصور ده ممكن يكون صح يبقي ايه اللي بيحصل هناك؟
هل الشهداء والأنبياء والصديقين والأبرار اللي سبقوه كلهم هناك بيبقوا في استقباله وبيحتفلوا بمجيئه احتفال مهيب؟
وبيباركوا له وبيهنوه بالشهادة؟
طيب هو...
بيبقي عامل إزاي؟
طالما ماكانش عارف انه شهيد واكتشف فجأة إنه بقي فعلا...بيكون حاسس ايه؟
بيبقي متفاجئ ومخضوض من اللي حصل؟
وبيبص حواليه ومش مصدق انه شايف الناس اللي بيستقبلوه دول؟
طب والمكان اللي بيشوفه للمرة الأولي...
خاصة انه مكانه في أعلي المراتب في الجنة...الفردوس الأعلي...
طب اللي بيستقبلوه من اصحابه الجداد بياخدوه من ايده وبفرجوه مكانه هناك...بيخلوه يشوف بيته الجديد اللي هيعيش فيه؟
هو اكيد بيبقي مبسوط...بس بيتكيف بسهوله؟
طيب واللي قتله...
يا تري بيكون غضبان منه؟
ولا مسامحه لأنمه ربنا جعله سبب في أجمل حاجة حصلت له في الدنيا؟
انه خلاه يفارقها بأفضل شكل ممكن...
طب يا تري بيسأل علينا؟
وبيفكر فينا وف حالنا؟
بيفكر هو مات علشان ايه؟
طب بيدعي لنا؟
....
لكن زوجي لم يجبني
ولن أعرف ما الذي يحدث إن لم ألحق بهم
فأرجو ان يتقبلني الله شهيدة وإن مِت علي فراشي
فأحشرني مع زمرة الشهداء
يا الله..
هناك تعليقان (2):
كلنا بنقعد نتسائل يا هبه
لكن الله اعلم الموضوع م متفصل
ومافيش عنه كلام كتير
لذلك احنا بنحذر وصدقينى
في جمله بتقول فيما معناها
ان كل ماتفكر في عن الله فهو عكسه تمامآ
يعنى لو بتفكرى ان ربنا هيخلى الشهيد يكوون في مكانه وكذا وكذا فهو ممكن يعمل اضعاف واضعاف من دة احنا كبشر لا نتصوره
وبس :) عجبنى الموضوع
أنا فاهماكي طبعا يا رونا واذا كان البني آدمين بيعملوا حاجات فعلا مش معقوله فما بالك بربنا بقي واللي بيعده لنا
الفكرة بس معايا بتبدأ من وقت مفارقة الروح للجسد
وبافكر فيها كتير حتي لو في حالات الموت العادية من بعد وفاة جدي
لكن دلوقت الموضوع زاد وده اللي المجلس العسكري والنظام عمله في جيلنا الله لا يسامحهم
وربنا يرمك يارب
:)
إرسال تعليق